Əsas keçidlər
Həyat Elmləri Departamenti Biologiya müəllimliyi, Kimya və Biologiya müəllimliyi və Baytarlıq təbabəti ixtisasları üzrə bakalavr pilləsində təhsil alan tələbələrin tədris və metodiki işlərinin icrasını və onların tərbiyə işlərini təşkil edir, habelə fəlsəfə doktoru hazırlığı üzrə doktoranturada təhsil alan doktorant və dissertantların tədris və tədqiqat fəaliyyətini təşkil və nəzarət edir.
Həyat Elmləri departamentinin əsas məqsədi tələbələri Biologiya müəllimliyi, Kimya və Biologiya müəllimliyi, Baytarlıq təbabəti ixtisasları üzrə bakalavr proqramları və yüksək keyfiyyətli tədris prosesi ilə təmin etmək, eyni zamanda cəmiyyəti inkişaf etdirməyə və tənqidi düşünməyə qadir olan ali təhsilli, elmi-pedaqoji kadrlar hazırlamaqdır. Bundan əlavə, departamentimiz doktorantların elmi-tədqiqat işlərinin qaydalara uyğun yerinə yetirilməsinə şərait yaratmaqla, yeni doktorantura proqramlarının açılması üçün uyğun plan və proseduraların hazırlanmasında iştirak edir.
Departament Azərbaycan Respublikası Qanunvericiliyinə, Təhsil Qanununa, Azərbaycan Respublikası Təhsil Nazirliyinin normativ hüquqi aktlarına, təlimat və metodiki göstərişlərinə, qüvvədə olan digər qanunvericilik aktlarına, həmçinin Xəzər Universitetinin Nizamnaməsinə uyğun olaraq fəaliyyət göstərir.
Həyat Elmləri departamenti 2019-cu ilin fevral ayında Bioloji elmlər departamentinin əsasında yaradılaraq, Təhsil fakültəsinin tərkibindən Mühəndislik və Təbiət elmləri fakültəsinin tərkibinə daxil edilmişdir.
Bioloji Elmlər departamenti isə öz növbəsində, ilk dəfə 1992-ci ildə Tibb fakültəsinin tərkibində yaradılmış və 2010-cu ildən isə Təhsil fakültəsinin tərkibinə daxil edilmişdi.
Həyat Elmləri Departamenti həm bakalavr, həm də doktorantura pillələri üzrə dünya standartlarına uyğun təhsil proqramları təqdim edir. Bakalavr pilləsində tədris Azərbaycan, doktorantura pilləsində isə Azərbaycan və ingilis dillərində yerli və beynəlxalq təcrübəyə malik yüksək ixtisaslı professorlar tərəfindən həyata keçirilir.
Departamentin əsas məqsədi tələbələrə Biologiya müəllimliyi, Kimya və Biologiya müəllimliyi, Baytarlıq Təbabəti ixtisasları üzrə bakalavr təhsili üçün (BS) proqramlar təqdim etməkdir. Bu kurikulum sitologiya, zoologiya, botanika, genetika, ekologiya, biometriya, immunologiya, tibbi biologiya, heyvan anatomiyası, klinik diaqnostika, baytarlıq farmakologiyası və toksikologiyası, baytarlıq genetikası və s. kimi həyat elmlərinin əsas fundamental fənlərini təqdim edir. Praktiki dərslərin tədrisi üçün Hüceyrə Patologiyası Mərkəzinin laboratoriyasından istifadə edilir, doktorant və ya dissertantlar burada tədqiqat layihələri üzərində işləyirlər. Departament həyat elmlərinin müxtəlif sahələri, o cümlədən molekulyar biologiya, immunologiya, mikrobiologiya, genetika və biokimya üzrə fəlsəfə doktorluğu hazırlığı üzrədə proqramlar təklif edir.